Reflexión sobre a WebQuest

 

Hoxe falarémosvos do que é unha WebQuest e cales son as súas vantaxes e desvantaxes. Primeiro de todo, unha WebQuest consiste na presentación dun conxunto de actividades establecidas polo docente que guían ao alumnado na procura de información utilizando os recursos da internet, e así desenvolver habilidades de uso da información e de pensamento crítico, xa que non todo o que podemos atopar na internet é válido, científico e fiable.

Somos do Mar realizamos unha WebQuest para o noso alumnado, decidimos realizar unha reflexión sobre as vantaxes e desvantaxes que fomos observando ao longo das sesións.

Primeiro de todo falaremos das vantaxes, neste caso, a WebQuest é unha ferramenta na cal o alumnado é o protagonista absoluto do seu proceso de aprendizaxe. Empregar este método provoca que o alumnado teña unha actitude positiva con respecto ao tema que se está tratando, fomenta a curiosidade, a creatividade e as ganas de seguir avanzando na actividade. É un recurso que permite que os nosos alumnos descubran, gocen, pensen, e o máis importante, aprendan dunha maneira divertida e enriquecedora. Un punto a favor deste método é que en todo momento tense acceso a toda a información, é dicir, se nalgún momento o alumno non lembra que debía facer nunha actividade poderá retroceder nas páxinas (introdución, tarefa, proceso, recursos, avaliación e conclusión) para lembrar que era o que debía realizar e finalmente, seguir coa actividade. Por último, outro aspecto para remarcar, a utilización dunha WebQuest fai que o alumnado desenvolva un espírito crítico respecto á información que se atopan na internet a medida que van avanzando na actividade, xa que, como dixemos anteriormente, non todo o que nos atopamos aquí é seguro.

A continuación, mostrámosvos os inconvenientes de utilizar a WebQuest. En primeiro lugar, non toda a información que necesitamos está na internet e non todo o que se atopa é de boa calidade, por tanto, en ocasións poida que non atopemos a información que queremos. Doutra banda, o feito de utilizar este método implica que as aulas teñan un bo acceso á conexión da internet porque unha mala conexión podería dificultar a aprendizaxe. Por último, é necesario que os docentes teñan tempo suficiente para deseñar e crear adecuadamente a WebQuest, xa que se necesita coñecer ben a aplicación que imos empregar para poder atopar os elementos e ferramentas que necesitemos, que máis nos agraden e sexan máis útiles para que a actividade sexa creativa e enriquecedora, este aspecto débese ter en conta porque en moitas ocasións o profesorado carece de tempo para poder realizar ditas actividades.

Deixámosvos o link da nosa WebQuest para que vos animedes a realizar. Podeis darnos a vosa opinión! Esperamos que vos guste!!

https://laumanaur2021.wixsite.com/my-site  

😊😄😎